ملف كامل لحشوات الجلاش والسمبوسه ❤️😍❤️

اول حشوه وهى الحشوه التقليديه ..اللحمه المعصجه

الحشوه رقم *١*

طاسه فيها معلقه زيت وسمنه نزلي البصله المفرومه تتشوح لحد ماتصفر ..بعد كده زودي اللحمه المفرومه مع رشه فلفل اسود وشوحي خمس دقايق بعدها نزود الملح ورشه بهارات لحمه وشعره قرنفل مطحون وقرفه ...واقفلي ...تقدري بقي تزودي شويه بقدونس مفروم او شبت او بسله مسلوقه مع جزر او فلفل الوان ...اي حاجه تحبيها زوديها قبل ماتقفلي النار بدقيقه ❤️

الحشوه رقم *٢*

هاتي طاسه فيها زبده شوحي بصله تصفر نزلي مكعبات فراخ مع رشه فلفل وملح وبابريكا ولما تستوي زودي فلفل الوان وذره مسلوقه ومعلقه ك جبنه كريمي واقفلي واستني تبرد وكده جاهزه 👌😍

حشوه رقم *٣*

هاتي بطاطس مسلوقه واهرسيها مع مكعبين جبنه كيري وشويه شبت مفروم مع رشه كركم وملح وفلفل وشطه او بابريكا وبسس 😍😋 رهيبه الحشوه دي 

حشوه رقم *٤*

هاتي طاسه فيها معلقه زيت نزلي بصل مع فلفل الوان شوحيهم خمس دقايق بعدها نزلي علبه بلوبيف يتشوح كويس مع رشه ملح ...زودي عليه طماطم مكعبات بدون القلب وقلبي كله سوا خمس دقايق واقفلي 😋😋😋

حشوه رقم *٥*

ميكس جبن ( رومي شيدر موتزاريلا كيري ) يتهرسو كويس مع حبه البركه او زعتر او نعناع ويكونو جاهزين 

حشوه رقم *٦*

جبنه فيتا تتهرس مع بصل اخضر وفلفل وزيتون ورشه ملح وتكون جاهزه

حشوه رقم *٧*

 سبانخ مفرومه تتشوح مع بصل وتوم ورشه ملح ولما تنزل كل الميه زودي سماق وفلفل اسود واستني تبرد وزودي عليها لبنه او جبنه كريمي واحشي بيها

: حشوه رقم *٨*

بطاطس مسلوقه ومهروسه زودي عليها كاري وهريسه شطه وبقدونس مفروم ...وكده جاهزه

حشوه رقم *٩*

طاسه فيها شويه زيت نزلي كوسه جزر فلفل مشروم يتشوحو مع رشه ملح وفلفل ولما يدبلو زودي مكعب وبده ومكعب مرق واقفلي وحطي الخليط يصفي اي ميه زياده واحشي بي جلاش او سمبوسه وتقدري تزودي مكعبات فراخ او لحمه مفرومه او حتي شويه جبنه شيدر بتكون خطيره

: حشوه رقم *١٠*

طاسه شوحي فيها بصلايه صغيره مع فص توم ولما تبدل نزلي مكعبات فراخ صغيره خالص تتشوح مع ملح وفلفل اسود وبعد كده زودي مشروم مفروم يتشوح كويس ...وحطي نص كوب كريمه وسيبي الصوص ينشف شويه والفراخ تتشرب واقفلي النار واستني يبرد ويكون جاهز