كل ‏اكلات ‏عيد ‏الاضحي ‏.... ‏سهلنا ‏الدنيا ‏عليكو ‏واكلات ‏عيد ‏الاضحي ‏كلها ‏في ‏مقال ‏واحد...كوارع...كرشطه....فشه ‏وطحال...الكبده...لحمه ‏الراس...الممبار ‏

مدونه كل يوم جديد مع الشيف سهلت عليكي الدنيا خالص وجمعتلك كل اكلات عيد الاضحي المبارك في مقال واحد الاكلات اللي كلنا بحبها وكل عام وانتم بخير 

اولا الكبدة

************

ا_الكبدة البانيه

المقادير

نص كيلو كبدة مقطعة شرائح

بصله وبهارات ملح فلفل وليمون

بيضه وشوية لبن

دقيق وبقسماط

الطريقة

تجيبى الكبدة تتبليها بشويه ملح وفلفل وكمون وليمون وتحطيها في مصفى علشان تصفى اى دم فيها

بعد كدة نفرم البصله مع البهارات والملح ناعم ونتبل الكبدة بالبصل ونسيبها ساعة

ثم نحطها في الدقيق وبعدين البيضة عليها شوية لبن صغيرين وملح وفلفل

وبعد كدة بقسماطونحمرها على نار متوسطة حتى تنضج

2_ كبده اسكندراني

اولا الكبده بتتقطع صوابع رفيعه هنقطع بصله وفلفلايه رومي ومعلقه توم ونشوحهم في حبه زيت نزلنا بالكبده علي نار عليه نشوحها عشان متنزلش مايتها بعد ما تتشوح ننزل عليها بالطماطم ونعصر عليها نقطتين ليمون ومعلقه خل و الملح والفلفل الاسودرشة قرفه رشة جنزبيل هنوطي عليها ونسبها 5 دقايق مش بتاخد اكتر من كده

ثانيا_ المخ

************

1_المخ بانيه

غسلته براحه خالص بملح وخل وقطعته شرايح ثم تبلته بشويه ملح وفلفل وكمون وليمون لمدة نصف ساعه ثم غمسته في البيض وبعدين الدقيق زي وضغطت عليه بس مش اوي لاحسن يتهري وبعدين حمرته في زيت عميق

2-المخ المقلى

جبت حله وحطيت فيها ميه وقطعت بصل وجزر وتوابل ملح وفلفل وكمون وورق لوري ونزلت فيه المخ وحسبت 10 دقايق وشلته من الميه ودخلته الفريزروحضرت التتبيله كانت توم مفروم وبصل مدعوك بالفلفل الاسمر ولمونه

وبعد ما تماسك المخ طلعته وبدات اقطعه وحطيت عليه التتبيله ودخلته تاني الفريزر وجبت دقيق وبيض وبقسماط حطيته في الدقيق وبعدين البيض وبعدين البقسماااااااااااط ودخلته التلاجه شويه وبعدين قليته في زيت

ثالثا الممبار🙈🥰

***********

المقادير

كيلو ممبار

اكيلو طماطم

خضرة (شبت بقدونس كزيرة)

بصل

1كيلو رز

توابل ملح فلفل كمون بهارات قرفه جنزبيل

نفرم البصل ونفرم الخضرة ونعمل الطماطم فى الخلاط

ونغسل الارز زنصفيه كويس ونبتدى نجيب حله نحط فيها شوية سمنه

ونحط البصل المفروم ونشوحه لحد مايحمروبعدين نعصر الطماطم فى الخلاط ونضيفها على البصل ونسيب الطماطم تتسبك

مع البصل اول مانسبك الطماطم نضيف التوابل

ملح فلفل كمون بهارات رشة قرفة ورشه جنزبيل رشة نعناع اخضر

ونقلب كويس نضيف الارز ونقلب واخر حاجه الخضرة تكون مفرومه ومغسوله كويس وبعدين نجيب الممبار ونفتحه من فوق ونبتدى نحشيه واحده ورا التانيه بس مش نملاه رزه لما نخلص الحشو كلهم نجيب حله وفيها ميه مغليه ونحط

ورق لورى وحبهان بصلة صغيرة جزرة صغيرة علشان الزفر تغلى نسقط الممبار ونسلقه ونطلعه من السلق فى مصفه ينزل اى سوايل به ونحمرة فى طاسه بها زيت غزير

رابعا لحمه الراس مافيش غنا عنها 

**************

طاجن لحمة الرأس

طبعا غسلت اللحمه وصفيتها وسلقتها نص سلقه

بعدين طلعتها من الحله وقلبت عليها عصير طماطم وبصل مقطع شرائح دعكته بالفلفل الاسمر اوى وفلفل مقطع صغير وبهارات مشكله وقرفه وجنزبيل وجوزة الطيب ومعلقتين صلصه طماطم قلبتهم كلهم مع بعض وحطيتهم فى حله وعلى النار يخدوا غلوتين وبعدين ضيفت الملح وقلبت كل الخليط ده فى الطاجن وعلى الفرن لغايه ما يحمر الوش

خامس الفشه والطحال حلويات اللحمه

*********************

الفشه والطحال

نغسل الفشه والطحال بالميه

نجيب حله فيها ميه وفيها

بصل - كرفس- جزر- قرفه- حبهان-لورا- مستكه- قرفه- كمون - فلفل اسود - قرنفل تترك تغلى

ثم نسقط فيها الفشه والطحال نص ساعه او ساعه الا ربع

بعدين ننشلها ونغسلها بميه م الحنفيه

نرش عليها شويه كمون حلوين وملح ونقطعهاتترك تغلى ثم نسقط فيها 

الفشه والطحال نص ساعه او ساعه الا ربع

نرش عليها شويه كمون حلوين وملح وقرفه وجنزبيل ونقطعها نقليها فى الزيت

سادسا الكوارع اساسي معانا في العيد 

*************

كارعين صغيرين عجالى

جزره /2طماطم صغيره او طماطميه كبيره /بصله /5فصوف توم /زبده اوسمنه/ 2فص حبهان

الطريقه

نحط الكوارع طبعا تجيبها متكسره من عند الجزار تحطيها تغلى اول مره ميه بس وتطلع الزفره بتاعتها تدلقى الميه وتغسليها حلو

وتحطى ميه فى الحله وتحى الكوارع وتحطى فى الميه البصله والطماطم والحبهان والجزره ورق لورا وحبهان ومستكه و تحطيها على

على البوتجاز لحد ما تستوى هى لو صغيره مش بتاخد وقت وتكونى على العين التانيه الرز رز الفته الكوارع الارز اغسله وانقعه ربع ساعه وبعدين اضع ملعقة سمنه فى حله واصفى الارز واشوحه مع ملعقة ملح وبعدين اضيفله شوربه

واسيبه يستوى وكمان الصلصه بفرم الثوم واحمره فى سمنه واطشه بملعقة خل واعصر طماطم واضيفها على الثوم ونصف ملعقة ملح واسيبها تتقل شويه وخلاص كمان العيش بقطعه واحمصه فى ملعقة زيت نضع العيش فى طبق التقديم وعليه ملعقتين صلصه وشوية شوربه ونغطى عليه ثوان بعدين نضيف الارزبعدين بضيف الصلصه والكوارع على الوش

سابعا كرشه بالبطاطس والصلصه

****************************

كيلو كرشه

عصير طماطم

بطاطس مقطعه مكعبات

بصله مفرومه

راس توم متوسطه مهروسه

ملح فلفل اخضر

فلفل اسودحبهان ومستكه شطة(حسب الرغبه)

زيت

اول شئ نغسل الكرشه بالدقيق والملح وبعدين انفعها فى خل وليمون عشان ريحتها

وبعدين اسلقها فى مياه سخنه واحط عليها عيدان من القرفه وعود كرفس وجزرواسيبها تغلى شويه اشطفها كويس واحطها فى مصفاه اجيب حله واحط شويه زيت احط الكرشه واحط عليه الخلطه المكونه من

التوم المهروس على الكمون والكسبره الناشفه وعليهم الفلفل الاخضر وهرستهم مع بعض واحط المستكه والحبهان واقلبهم يعنى اشوحها لما الثوم يتغير شويه احط البطاطس المكعبات عليها واقلبها شويه وبعدين احط عصير الطماطم

وانا بحط عصير الطماطم بكون مجهزة البصل المفروم وعليه الفلفل الاسود واقلبهم كويس واضيفها عليهم واسيبها تسبك وتستوى ما اخدتش وقت وظبط الملح بتاعها

ثامنا صينية لسانات خروف بالفرن

****************************

لسانات خروف ـ ملح وطحين وخل لفرك اللسانات ـ بصلة كاملة وبهارات لحمه وفلفل وكمون وقرفه وجنزبيل وجوزة الطيب سبع بهارات حبهان

بطاطس ـ بصل ـ طماطم ـ فصوص تومة كبار ـ عصير ليمونة

الطريقة :

بنفرك اللسانات بالملح والطحين والخل جيدآ وبنغسلهم ونعيد مرتين تلاته وبعدين نسلقهم مع البصلة والمطيبات حتى يستووا وبشيل الريم من فوق وبغطي عليهم، باخدو بحدود الساعة .

أثناء سلق اللسانات بنقشر البطاطس والبصل ونقطعهم ونقطع الطماطم ، بنقلي البطاطس 1/2 قلية .

ندق التوم ونحطه في صحن ونضيف عليها عصير الليمون والملح والتوابل ونخلطهم ,

بناخد اللسانات المستوية وهيّ سخنة علشان تعرفي تقشري جلدها بسهولة ،بقطع كل لسان لجزئين بالطول .

بصينية الفرن بحط البطاطس واللسانات وأضيفلهم خلطة التوم والليمون وأقلبهم ، وأرص فوقهم البصل والطماطم وبضيف على الصينية حوالي كوبين من مرقة ورشة ملح وفلفل على الفرن الساخن ويترك حتى يستوي وبالآخر بنحمر الوجه

مدونه كل يوم جديد مع الشيف تتمني لكم عيد سعيد ومبارك 😍