اصابع وكرات جوز الهند بالشيكولاته. الباونتي. جيرسي بتاع زمان

🥥 أصابع وكرات جوز الهند بالشيكولاته(الباونتي) 🍫

جيرسي اللي كلنا بنحبها مع مدونه كل يوم جديد مع الشيف هنعملها في البيت

المقادير...

3ونص كوب جوز هند ناعم

علبه حليب مكثف محلي جاهز او بيتي

ربع كيلو شيكولا خام بالحليب

الطريقة... 

ف طبق غويط نحط جوز الهند و عليه الحليب المكثف المحلي بالتدريج لحد ما تتكون عجينه قابله للتشكيل لما نضغط عليها بإيدينا تتماسك نشكلها حسب الرغبه..

انا ضغطتها ف قالب مستطيل القاعده عشان يبقى الشكل مظبوط ممكن علبه تلاجة او المتوفر... نغطيها وندخلها التلاجة تتماسك وشكلت كذا قطعه على شكل كرات بتبقى شكلها لطيف وشيك جدا ف التقديم وبتعمل كميه كبيره...

نحط الشيكولا ع حمام مائي تسيح... ونخرج عجينه جوز الهند من التلاجة نقطعها و ننزلها في ال شيكولا و نرفعها بشوكة عشان تصفي كويس من اي شيكولا زياده و نرصها ع كيس تلاجة مفتوح او ورقه زبده... ولما تجمد نشيلها ف علبه ف التلاجة... ووقت التقديم برصها ف ورق ال شيكولا. 

👌👌👌ملحوظات مهمه جدا... 👌👌👌

1️⃣جوز الهند🥥 لازم ولابد يبقى طازه ريحته نفاذه وباين انه جديد مش قديم وعديم الريحة لأنه اساس الوصفه وأفضل نوعين هو السيريلانكي والفيتنامي انا مستخدمه فيتنامي👌🏻

2️⃣نوع الشيكولا🍫 لا يقل اهميه عن جوز الهند نختار نوع كويس.. الوصفه دي كل ما كان جودة الخامه المستخدمة عاليه كل ما تحسو انها متفرقش ابدا عن الجاهزة.

3️⃣لو حابين نكهة وطعم أقوى بضيف للمكونات معلقه صغيرة او اكتر حسب الرغبه من زيت جوز الهند القابل للأكل بيدي نكهة وريحة مع الطعم وهميييه👌...